المواويل(للابنودى)

المواويل

أنا باشكر اللى خلق لى الصوت وأوصانى

أقول كلام حُرّ.. مايقبلْش لون تانى

مااسكتش ع الضِّيم واهشّ الغيم بقولة «آه»

وإن سرقوا صوتى.. بينسوا ياخدوا قولة «آه»

فى الفرْح فى الجرح إيه حيلتى إلاّ قولِة «آه»

يحميك يا ولدى وكنت اسكت وتتكلم

يحميك يا ولدى واكون مجروح وتتألم

ياما حرسْت النهار.. آدى النهار.. ضلِّم

وإن شفت جرح الوطن جوّه الفؤاد علم

تقول كلام.. ياسلام.. يحيينى من تانى!!

■ ■ ■

أنا كان لى ورْدات عجب.. كبّرتها بايدى

أسقيها بالدمع بالدم اللى فى وريدى

جانى غشيم القدم وداس على ورودى

أخدم جناينى فى بستانى يا ناس إزاى؟

وإن نمت ناسى باقوم فاكر يا ناس إزاى؟

مين مرّر الشاى فى شفايفى وبكى الناى؟

ياليل يابو الهمّ.. تحتك دم.. ما تحاسب

وقوللّى إمتى يا ليل.. وفين حنتحاسب؟

إزاى بلادى تبات ليلة مع الغاصب

وإزاى يدوس وردها.. واقولّه: «ياسيدى؟!

■ ■ ■

مدّ الأمل سِكِّتُه.. وقالِّنا: «سيروا

نصيبكو حيصيبكوا تمشوا والاَّ حتطيروا

عيشوا النهارده الزمن.. بكره زمن غيره

آدى أول السكة صوت الضحكة بيلالى

والشمس أمشيلها ألاقيها اللى ما شيالى

ولا حدّ يقدر يعكّر قلبنا الخالى

لكن ومين بكرة يعرف إحنا فين فيها؟

هيه حتدينا والا احنا حندّيها؟

وإيه نصيبنا من الأيام ولياليها؟

غاب الزمن فى الزمن.. واحنا بِلا عزوة

ولا نملك الا نماشى السكة ونسيروا»!!

■ ■ ■

ويا مصْر وان خيّرونى ما اسكن الاَّكى

ولاجْل تتبِّسمى.. يا ما بابات باكى

تسقينى كاس المرار.. وبرضُه باهواكى

بلدى ومالى الّا إنتى ولو ظلمتينى..

مقبولة منِّك جراح قلبى وْدموع عينى

الجرح يشْفَى إذا بإيدك لمستينى..

كلّك حلاوَة.. وكلمة «مصر».. أحلاكى!!

■ ■ ■

التّناتيش

من يمدحُه يطلع خاسر

ويشبَّروله.. أيامه

يعيش جمال عبدالناصر

يعيش بصوته وأحلامه

■ ■ ■

مش ناصرى ولا كنت ف يوم

بالذات فى زمنه وف حينه

لكن العفن وفساد القوم

نسّانى حتى زنازينه.. فى سجون عبدالناصر

■ ■ ■

إزاى ينسّينا الحاضر..

طعم الأصالة اللى فى صوته؟

يعيش جمال عبدالناصر

يعيش جمال حتى ف موتُه ما هو مات وعاش عبدالناصر!!

■ ■ ■

إسمه جمال وجميل فعلاً

ياما شفنا شجعان خوّافه

عظيم.. وكان إنسان طبعاً

المجد مش شغل صحافة علشان ده عاش عبدالناصر

■ ■ ■

أعداؤه كرهوه ودى نعمة

مِن كرهُه أعداؤه صادق

فى قلبه كان حاضن أمَّه

ضمير وهمَّة ومبادئ

■ ■ ■

ملامحنا.. رجعت بعد غياب

دلوقت بس اللى فهمناه

لا كان حرامى ولا كداب

ولا نهبها مع اللى معاه

■ ■ ■

عشنا الحياة ويّاه كالحلم

فلا فساد ولا رهن بلاد

يومها انتشينا ثقافة وعلم

وف زمنه ماعشناش آحاد

■ ■ ■

كان الأمل فى خُضرِتُه بِكْر

مافيش لصوص للقوت والمال

ومصر أبطال ورجال فكر

ومثقفين ستات ورجِال

■ ■ ■

كان الهلال فى قلبه صليب

ولا شفنا حزازات فى بلادنا

ولا شُفنا ديب بيطارد ديب

ولا جرَس خاصم مادنة وَحَّدْنا صُوت عبدالناصر

■ ■ ■

دفعنا تمن الحريّة

بدمّ مش بدينار ودولار

يوم وقفته فى «المنشيّة»

خلّى الرصاص يهرب من عار

■ ■ ■

رغم الحصار كنا أحرار

وفى الهزيمة الشعب ماجعْش

كان اسمها «بلد الثوار»

وقرار زعيمها مابيرجعْش

■ ■ ■

خلَّى بلادُه.. أعزّ بلاد

ليها احترام فى الكون مخصوص

لا شفنا وسط رجالُه فساد

ولا خطط سمسرة ولصوص

■ ■ ■

لولاه ماكنتوا اتعلمتوا

ولا بقيتوا «دراكولا»

ياللى انتو زعما وإنجازكو

دخّلتوا مصر الكوكاكولا وبتشتموا ف عبدالناصر

■ ■ ■

عمره ما جاع فى زمانه فقير

أو مالتقاش دوا للعِلّة

دلوقت لعبةْ «اخطف طير»

والأمة فى خِدْمةْ شِلَّة

■ ■ ■

يتّريقوا على طوابيرُه

علشان فراخ الجمعية

شوفوا غيره دلوقت وخيرُه

حتى الرغيف بقى أمنيّة
■ ■ ■

فيه ناس بتنهب وتسوِّف

لا يهمّها من عاش أو مات

ورضا العدو عنّا يخِوِّف

معناه أكيد إننا قَفَوات
■ ■ ■

الأرض رجْعت للإقطاع

وقالوا: «رجعت لصْحابها»

وصاحبَك الفلاح تانى ضاع

ضاعْت العقود واللى كتبها وخط إيد عبدالناصر!

■ ■ ■

أنا أذكُرك من غير ذكرى

والناس بتفتكرك بخشوع

الأمس واليوم ده وبكره

يبكوك بعظمة مش بدموع

■ ■ ■

دلوقت رجعوا الفقرا خلاص

سكنوا جحورهم من تانى

رحل معاك زمن الإخلاص

وِجِهْ زمن غير إنسانى
■ ■ ■

صحينا على زمن الألغاز

يحكمنا فيه «أهل الأعمال»

وللعدو.. صدّرنا الغاز

بفرحة وبكل استهبال

■ ■ ■

بنمدها بغاز الأجيال

تحويشةِ الزمن القادم

إتوحَّشوا فْ جمع الأموال

ورجعْنا سادة.. وخوادم
■ ■ ■

يا جمال.. نجيب زيك من فين

يا نار.. يا ثورة.. يا ندهِةْ ناى..

البوسطجى.. إللى اسمه «حسين»

- أبوك - منين جابك؟ وإزاى..

■ ■ ■

لو حاكتبك.. ما تساع أقلام

ولا كلام غالى وأوراق

الأمر وما فيه.. أنا مشتاق

فقُلتْ امسِّى عليك وأنام

» يا عنكبوتة كملي عشك (للابنودى)
» خايف أموت من غير ما اشوف تغيير الوشوش) (للابنودى)